05 July 2019

ലോകത്തെ ഹിന്ദി പഠിപ്പിക്കാന്‍ ഇന്ത്യ ചെലവാക്കിയത് 43 കോടി രൂപ (വിഷൻ ന്യൂസ്‌ 05/07/2019)
(VISION NEWS 05 July 2019)




ന്യൂഡല്‍ഹി: ഹിന്ദി ഭാഷ ലോകത്തെ വിവിധയിടങ്ങളില്‍ പ്രചരിപ്പിക്കാന്‍ തുടര്‍ച്ചയായ ശ്രമങ്ങള്‍ കഴിഞ്ഞ അഞ്ച് വര്‍ഷങ്ങളില്‍ നടത്തിയതായി കേന്ദ്രസര്‍ക്കാര്‍. വിദേശകാര്യ വകുപ്പിന്‍റെ നയതന്ത്ര മിഷനുകളിലൂടെയാണ് ഹിന്ദി പ്രചരിപ്പിക്കാനായി ശ്രമങ്ങള്‍ നടത്തിയത്. ഇതിനായി 43.48 കോടി രൂപയാണ് ചെലവഴിച്ചത് - രാജ്യസഭയില്‍ സര്‍ക്കാര്‍ അറിയിച്ചു.
കേന്ദ്ര വിദേശകാര്യ സഹമന്ത്രി വി മുരളീധരന്‍ ആണ് ഇക്കാര്യം സഭയില്‍ അറിയിച്ചത്. ഹിന്ദി ഐക്യരാഷ്ട്രസഭയില്‍ ഔദ്യോഗിക ഭാഷയാക്കാനും ലോകം മുഴുവന്‍ ഹിന്ദി പ്രചരിപ്പിക്കാനും ശ്രമങ്ങള്‍ നടത്തുകയാണെന്നാണ് വി മുരളീധരന്‍ സഭയില്‍ പറഞ്ഞത് - പിടിഐ റിപ്പോര്‍ട്ട് ചെയ്‍തു.
ഐക്യരാഷ്ട്ര സഭ രീതിയനുസരിച്ച് ഹിന്ദി ഔദ്യോഗികഭാഷയായി അംഗീകരിക്കണമെങ്കില്‍ ജനറല്‍ അസംബ്ലി പ്രമേയം പാസ്സാക്കണം. മൂന്നില്‍ രണ്ട് ഭൂരിപക്ഷത്തില്‍ വേണം പ്രമേയം അംഗീകരിക്കാന്‍. ഇതിന് പുറമെ അധികമായി ചെലവാകുന്ന പണം ഐക്യരാഷ്ട്ര സഭ അംഗങ്ങള്‍ ചെലവഴിക്കണം.
2018-19 വര്‍ഷം ഹിന്ദി പ്രചരിപ്പിക്കാന്‍ വേണ്ടി സര്‍ക്കാര്‍ ചെലവഴിച്ചതാണ് ഏറ്റവും ഉയര്‍ന്ന വിഹിതം. 21.17 കോടിരൂപയാണ് കഴിഞ്ഞ വര്‍ഷം ചെലവഴിച്ചത്. ഇന്ത്യ, ഐക്യരാഷ്ട്ര സഭയുമായി ഒരു ധാരണാപത്രം ഒപ്പിട്ടിരുന്നു. ഇതനുസരിച്ച് ഐക്യരാഷ്ട്രസഭയിലെ രേഖകള്‍ ഹിന്ദിയിലും പ്രസിദ്ധീകരിക്കാന്‍ ഇന്ത്യ സഹായിക്കും.
സോഷ്യല്‍ മീഡിയയില്‍ ഹിന്ദി ഭാഷയില്‍ വിവരങ്ങള്‍ പ്രസിദ്ധപ്പെടുത്താന്‍ ഐക്യരാഷ്ട്രസഭ കഴിഞ്ഞ വര്‍ഷം ജൂലൈ മാസം മുതല്‍ ആരംഭിച്ചിരുന്നു. ഐക്യരാഷ്ട്രസഭ വാര്‍ത്താ ബുള്ളറ്റിനും ഹിന്ദിയില്‍ ആഴ്ച്ചതോറും പ്രസിദ്ധീകരിക്കുന്നുണ്ട്.
അന്താരാഷ്ട്ര ഭാഷയായി ഹിന്ദി പ്രഖ്യാപിക്കുന്നതിന് ഇന്ത്യ 2008 മുതല്‍ ശ്രമം തുടരുകയാണ്. 2014ല്‍ നരേന്ദ്ര മോദി ഐക്യരാഷ്ട്രസഭയില്‍ പ്രസ്‍താവന വായിച്ചത് ഹിന്ദിയിലാണ്. പിന്നീട് 2015ല്‍ ഒരിക്കല്‍ക്കൂടി നരേന്ദ്ര മോദി ഹിന്ദിയില്‍ സംസാരിച്ചിരുന്നു.
വിദേശവിദ്യാര്‍ഥികള്‍ക്ക് ഹിന്ദി പഠിക്കാന്‍ സ്കോളര്‍ഷിപ്പുകള്‍ അടക്കം ഇന്ത്യ ഏര്‍പ്പാടാക്കുന്നുണ്ട്. ഹിന്ദി പഠിപ്പിക്കാന്‍ വേണ്ടി അന്താരാഷ്ട്ര കോണ്‍ഫറന്‍സ് നടത്താനും ഇന്ത്യ തീരുമാനിച്ചിട്ടുണ്ട്.


Post a comment

Whatsapp Button works on Mobile Device only