07 December 2020

മുക്കം പോലീസ് സ്റ്റേഷന് ആശ്വാസം : പിടിച്ചിട്ട വാഹനങ്ങൾ ലേലം ചെയ്തുതുടങ്ങി
(VISION NEWS 07 December 2020)

👉വാർത്തകൾ വാട്സപ്പിൽ ലഭിക്കുവാൻ ഇവിടെ ക്ലിക്ക് ചെയ്യുക




മുക്കം:
വിവിധ കേസുകളിൽപ്പെട്ട് ഇരുപത് വർഷത്തിലേറെയായി മുക്കം പോലീസ് സ്റ്റേഷൻ പരിസരത്തു കിടന്നിരുന്ന വാഹനങ്ങൾ ലേലം ചെയ്തു തുടങ്ങി. റൂറൽ ജില്ലാ പോലീസ് മേധാവി ഡോ. എ. ശ്രീനിവാസിന്റെ നിർദേശപ്രകാരം മുക്കം ഇൻസ്പെക്ടർ എസ്. നിസാമിന്റെ നേതൃത്വത്തിലാണ് ലേലംചെയ്ത വാഹനങ്ങൾ സ്റ്റേഷനിൽനിന്ന് നീക്കം ചെയ്യുന്നത്.

ഇരുപത് വർഷത്തിലധികമായി സ്റ്റേഷൻ പരിസരത്ത് കെട്ടിക്കിടക്കുന്ന നൂറോളം വാഹനങ്ങളാണ് ലേലംചെയ്തത്. സ്റ്റേഷന്റെ പിറകിൽ മൂന്നേക്കറോളം വരുന്ന സ്ഥലത്ത് കാടുമൂടിക്കിടന്ന വാഹനങ്ങൾ ഏറെ പരിശ്രമിച്ചാണ് കഴിഞ്ഞ മൂന്നുദിവസങ്ങളായി പുറത്തെടുത്തുകൊണ്ടിരിക്കുന്നത്. റൂറൽ ജില്ലാ പോലീസ് ആസ്ഥാനത്ത് നടന്ന ലേലത്തിൽ പാലക്കാട് ഒറ്റപ്പാലം സ്വദേശിയാണ് വാഹനങ്ങൾ ലേലത്തിൽ വാങ്ങിയത്. ബാക്കിയുള്ള വാഹനങ്ങൾ കൂടി എത്രയും പെട്ടെന്ന് ലേലം ചെയ്യുമെന്ന് റൂറൽ ജില്ലാ പോലീസ് മേധാവി അറിയിച്ചു. മുക്കം പോലീസ് സ്റ്റേഷന് പുതിയ ബഹുനിലക്കെട്ടിടം പണിയാൻ അനുമതി നൽകി കഴിഞ്ഞ വർഷം സർക്കാർ ഉത്തരവിറക്കിയിരുന്നു.

കഴിഞ്ഞ വർഷം അവസാനത്തോടെ പണി തുടങ്ങുമെന്ന് അറിയിച്ചിരുന്നെങ്കിലും തുടർച്ചയായി രണ്ടുപ്രളയവും കോവിഡ് ഭീതിയും വന്നതോടുകൂടി പ്രവൃത്തി തുടങ്ങുന്നത് വൈകുകുകയായിരുന്നു. പുതിയ കെട്ടിടം പണിതുടങ്ങുന്നതിനു മുൻപ് കേസിൽ ഉൾപ്പെട്ട വാഹനങ്ങൾ നീക്കം ചെയ്യുന്നത് കെട്ടിട നിർമാണ പ്രവൃത്തി സുഗമമാക്കുന്നതിനു സഹായകമാകും. 

Post a comment

Whatsapp Button works on Mobile Device only