25 ജൂൺ 2021

വെറും വയറ്റില്‍ വെള്ളം കുടിക്കാം; ആരോഗ്യഗുണങ്ങള്‍ ഏറെ
(VISION NEWS 25 ജൂൺ 2021)





 
മനുഷ്യശരീരത്തിന്റെ സുഗമമായ പ്രവര്‍ത്തനത്തിന് ജലം അത്യന്താപേക്ഷിതമാണ്. മനുഷ്യശരീരത്തില്‍ എഴുപത് ശതമാനവും ജലമാണ് ഉള്ളതെന്നാണല്ലോ കണ്ടെത്തൽ. ഒരു വ്യക്തി രണ്ട് മുതല്‍ മൂന്ന് ലിറ്റര്‍ വെള്ളം പ്രതിദിനം കുടിക്കണമെന്നാണ് കണക്ക്. ശരീരത്തിലെ ദഹന പ്രക്രിയയും ഹോര്‍മോണ്‍ പ്രവര്‍ത്തനങ്ങളും നടക്കുന്നതിന് ശുദ്ധജലം ഒഴിച്ചുകൂടാന്‍ പറ്റാത്ത ഘടകമാണ്. അവയവങ്ങളുടേയും പേശികളുടേയും സുഗമമായ പ്രവര്‍ത്തനത്തിന് ജലം ഒഴിവാക്കാനാവില്ല. ഒന്നോ രണ്ടോ ഗ്ലാസ്സ് വെള്ളം അതിരാവിലെ എല്ലാ ദിവസവും കുടിക്കുന്നത് ആരോഗ്യ സംരക്ഷണത്തിന് ഏറെ ഉത്തമമാണ്. വെറും വയറ്റില്‍ വെള്ളം കുടിച്ചാലുള്ള ആരോ​ഗ്യ​ഗുണങ്ങളെ കുറിച്ചറിയാം.

ദിവസവും വെറും വയറ്റില്‍ വെള്ളം കുടിക്കുന്നത് ദഹനനാളിയെ ശുദ്ധീകരിക്കാന്‍ സഹായിക്കുന്നു. ധാരാളം വെള്ളം കുടിക്കുമ്പോള്‍ അതു പുറത്ത് കളയാനുള്ള ത്വര ശരീരത്തിനുണ്ടാകും. ഇങ്ങനെ ദിനവും ചെയ്യുകയാണെങ്കില്‍ വയര്‍ ശുദ്ധീകരണം സ്വാഭാവികമായും സംഭവിക്കും. രാവിലെയുള്ള ജലപാനം മൂത്രവിസര്‍ജനം ത്വരിതപ്പെടുത്തും. മൂത്രാശയ അണുബാധയ്ക്ക് സാധ്യത കുറയും. മൂത്രാശയത്തിലും കിഡ്‌നിയിലും കല്ലുണ്ടാവുന്നത് തടയാനും ചെറിയ കല്ലുകളെ ഇല്ലാതാക്കാനും വെറും വയറ്റില്‍ വെള്ളം കുടിക്കുന്നതിലൂടെ സാധിക്കും.

രാവിലെ വെറും വയറ്റില്‍ വെള്ളം കുടിക്കുമ്പോള്‍ ശരീരത്തിന് വിഷവസ്തുക്കളെ പുറന്തള്ളാനുള്ള പ്രത്യേക കഴിവ് ലഭിക്കുന്നു. ഇതുവഴി ചര്‍മ്മത്തെ ആരോഗ്യ പൂര്‍ണ്ണമായും തിളക്കമുള്ളതായും നിലനിര്‍ത്താന്‍ സാധിക്കുന്നു. ഇത് മുഖക്കുരുവിനെ കുറയ്ക്കുകയും ചര്‍മ്മത്തെ മോയ്സ്ചറൈസ് ചെയ്ത് സംരക്ഷിക്കാന്‍ സഹായിക്കുകയും ചെയ്യുന്നു. ശരീരഭാരം കുറയ്ക്കാന്‍ ആഗ്രഹിക്കുന്നവര്‍ വെറും വയറ്റില്‍ വെള്ളം കുടിക്കുന്നത് ഏറെ ​ഗുണം ചെയ്യും. അതിരാവിലെ വെള്ളം കുടിക്കുന്നത് വഴി നിങ്ങളുടെ ശരീരത്തിലെ ഉപാപചയ പ്രവര്‍ത്തനങ്ങള്‍ മികച്ച രീതിയിലാക്കാന്‍ സഹായിക്കുമെന്ന് പഠനങ്ങള്‍ പറയുന്നു.

ഒരു അഭിപ്രായം പോസ്റ്റ് ചെയ്യൂ

Whatsapp Button works on Mobile Device only