15 സെപ്റ്റംബർ 2021

പ്രമേഹ രോ​ഗികൾ നിർബന്ധമായും കഴിക്കേണ്ട പത്ത് ഭക്ഷണങ്ങൾ
(VISION NEWS 15 സെപ്റ്റംബർ 2021)





ജീവിതശൈലീ രോ​ഗമാണ് പ്രമേഹം.എന്ത് കഴിക്കാം? എന്ത് കഴിക്കരുത്? എന്നതിലൊക്കെയുള്ള അറിവില്ലാത്തത് പ്രമേഹ രോ​ഗികളെ ബുദ്ധിമുട്ടിലാക്കും. ചിട്ടയായ വ്യായാമം പിന്തുടരുകയും ഭക്ഷണ ശീലങ്ങളിൽ കാര്യമായ മാറ്റങ്ങൾ കൊണ്ടുവരികയും ചെയ്‌താൽ ടൈപ്പ് 2 പ്രമേഹം നിയന്ത്രണവിധേയമാക്കാം.ശരീരത്തിലെ പോഷക ഘടകങ്ങളുടെ ആവശ്യകത മനസ്സിലാക്കി ഭക്ഷണക്രമത്തിൽ വ്യത്യാസം കൊണ്ടുവരികയാണ് ആദ്യം ചെയ്യേണ്ടത്. പലരുടെയും ധാരണ അരി ആഹാരങ്ങൾ ഒഴിവാക്കിയാൽ പ്രമേഹം നിയന്ത്രണവിധേയമാക്കാം എന്നതാണ്. ഇത് തെറ്റാണ്, പ്രമേഹ രോഗികൾ അന്നജത്തിന്റെ അളവ് കുറഞ്ഞതും എന്നാൽ പോഷകങ്ങൾ ധാരാളം ഉള്ളതുമായ ഭക്ഷണങ്ങൾ കഴിക്കാൻ ശ്രദ്ധിക്കുകയാണ് വേണ്ടത്

പ്രമേഹ രോഗികൾക്ക് കഴിക്കാവുന്ന ചില ഭക്ഷണങ്ങൾ നോക്കാം

ബീൻസ്

പ്രമേഹ രോഗികൾ നിർബന്ധമായും ഭക്ഷണത്തിൽ ഉൾപ്പെടുത്തേണ്ട വിഭവമാണിത്. ബീൻസിൽ ഗ്ലൈസെമിക് ഇൻഡക്സ് വളരെ കുറവായതിനാൽ ഇത് രക്തത്തിലെ പഞ്ചസാരയുടെ അളവ് കുറയ്ക്കാൻ സഹായിക്കും.

കൊഴുപ്പടങ്ങിയ മത്സ്യങ്ങൾ

ചിലയിനം മത്സ്യങ്ങൾ കഴിക്കുന്നത് ഹൃദ്രോഗ സാധ്യത കുറയ്ക്കുമെന്ന് പഠനങ്ങൾ കണ്ടെത്തിയിട്ടുണ്ട്. കൊഴുപ്പടങ്ങിയ മത്സ്യങ്ങളിൽ ഒമേഗ 3 ഫാറ്റി ആസിഡുകൾ ധാരാളമുണ്ട്. മത്തി, അയല, കോര, സാൽമൺ തുടങ്ങിയവയൊക്കെ ആഴ്ചയിൽ ഒന്നോ രണ്ടോ തവണ കഴിക്കാം. അന്നജത്തിന്റെ അളവ് ഇവയിൽ കുറവായതിനാൽ രക്തത്തിലെ പഞ്ചസാരയുടെ അളവ് കൂടുമെന്ന പേടിയും വേണ്ട.

​ഇലക്കറികൾ

പോഷകങ്ങൾ ധാരാളം അടങ്ങിയ ഇലക്കറികൾ പ്രമേഹം പിടിപെട്ടവർ ആഹാരത്തിന്റെ ഭാഗമാക്കാവുന്നതാണ്. പ്രമേഹത്തെ ചെറുക്കുന്ന ഒരു സൂപ്പർ ഫുഡ് ആണ് ചീര. ഇതിൽ അടങ്ങിയിരിക്കുന്ന ഫൈബറും മഗ്നീഷ്യവും പ്രമേഹത്തെ ചെറുക്കാൻ സഹായിക്കുന്നു. വേവിച്ചെടുത്ത ചീരയിൽ അല്പം ഒലിവ് ഓയിൽ ചേർത്ത് മിക്സ് ചെയ്ത കഴിക്കാം. ഗ്ലൈസെമിക് ഇൻഡക്സ് കുറവായതിനാൽ ഷുഗർ ലെവൽ കൂടാതെ നോക്കുകയും ചെയ്യുന്നു.

അണ്ടിപ്പരിപ്പുകൾ

നല്ല കൊഴുപ്പടങ്ങിയ അണ്ടിപ്പരിപ്പ് വർഗ്ഗങ്ങൾ ഹൃദ്രോഗ സാധ്യത കുറയ്ക്കുന്നതോടൊപ്പം രക്തത്തിലെ പഞ്ചസാരയുടെ അളവ് നിയന്ത്രിക്കുകയും ചെയ്യുന്നു. ദിവസവും നിലക്കടല കഴിക്കുന്നത് 21 ശതമാനം വരെ കുറയ്ക്കുമെന്നാണ് പഠനങ്ങൾ പറയുന്നത്. ബദാം, കശുവണ്ടി മുതലായവയൊക്കെ പ്രമേഹരോഗികൾക്ക് കഴിക്കാം. ബദാമിൽ അടങ്ങിയിരിക്കുന്ന മഗ്നീഷ്യം ശരീരത്തിലെ ഇൻസുലിന്റെ പ്രവർത്തനത്തെ സഹായിക്കും. മാത്രമല്ല, ഇതിൽ അടങ്ങിയിരിക്കുന്ന ഫൈബറും പ്രോട്ടീനും ഒക്കെ പ്രമേഹരോഗികളുടെ ഇഷ്ടവിഭവമായി മാറ്റുന്നു.

ആപ്പിൾ

പ്രമേഹരോഗികൾക്ക് കഴിക്കാൻ പറ്റുന്ന പഴങ്ങളിലൊന്നാണ് ആപ്പിൾ. ഇതിൽ ഗ്ലൈസെമിക് ഇൻഡക്സ് കുറഞ്ഞിരിക്കുന്നതിനാൽ രക്തത്തിലെ പഞ്ചസാരയുടെ അളവ് നിയന്ത്രണ വിധേയമാക്കാൻ സഹായിക്കുകയും ചെയ്യും. വിറ്റാമിൻ സി കൊണ്ടും ധാരാളം നാരുകളാലും സമ്പുഷ്ടമായ ആപ്പിൾ പ്രമേഹ രോഗികൾക്ക് ദിവസവും ഒന്ന് വീതം കഴിക്കാവുന്നതാണ്.

ഓട്സ്

ഓട്സ് എന്നാൽ പ്രമേഹ രോഗികളുടെ ഭക്ഷണം എന്നാണ് പൊതുവെ അറിയപ്പെടുന്നത്. രക്തത്തിലെ പഞ്ചസാരയുടെ അളവ് നിയന്ത്രിക്കാൻ ഓട്സിനു കഴിയും എന്നത് തന്നെയാണ് ഇതിനെ പ്രമേഹ രോഗികളുടെ പ്രിയ ഭക്ഷണമാക്കുന്നത്. ഓട്സിൽ അടങ്ങിയിരിക്കുന്ന ബീറ്റാ ഗ്ലൂക്കൻ എന്ന നാരുകൾ പ്രമേഹത്തെ നിയന്ത്രിക്കാൻ വളരെ ഗുണകരമാണ്. 

​ഓറഞ്ച്

സിട്രസ് വിഭാഗത്തിൽ പെട്ട പഴങ്ങൾ പ്രമേഹത്തെ നിയന്ത്രിക്കാൻ പണ്ടുമുതൽക്കേ പേരുകേട്ടതാണ്. നാരങ്ങാ വർഗ്ഗത്തിൽ പെട്ട ഫലങ്ങൾ ടൈപ്പ് 2 പ്രമേഹം നിയന്ത്രിക്കാൻ വളരെ സഹായകരമാണ്. പ്രമേഹ ബാധിതരിൽ ഉണ്ടാകുന്ന വിറ്റാമിൻ സി യുടെ കുറവ് നികത്താൻ ഈ ഫലങ്ങൾക്ക് കഴിയും. കൂടാതെ ഇവയിൽ ധാരാളമായി ആന്റി ഓക്‌സിഡന്റുകൾ അടങ്ങിയിരിക്കുന്നു. ഇത് പ്രമേഹരോഗിയുടെ ആരോഗ്യം സംരക്ഷിക്കാൻ വളരെയേറെ ഗുണകരമാണ്.

പാവയ്ക്ക

പാവയ്കയുടെ കയ്പ്പ് രുചി അത്ര പെട്ടന്നൊന്നും ആർക്കും ഇഷ്ടപ്പെടാൻ ഇടയില്ല. എന്നാൽ പ്രമേഹ രോഗികൾക്ക് ഏറ്റവും ഗുണകരമായ പച്ചക്കറിയാണിത്. ഇൻസുലിന്റെ പ്രവർത്തനത്തെ ത്വരിതപ്പെടുത്താനും രക്തത്തിലെ ഗ്ലൂക്കോസിന്റെ അളവ് നിയന്ത്രിക്കാനും പാവയ്ക്കയ്ക്ക് കഴിയും.

ചിയ വിത്തുകൾ

ധാരാളം ധാതുക്കളും ഫൈബറും ഒമേഗ 3 ഫാറ്റി ആസിഡും, ഫോസ്ഫറസും മഗ്നീഷ്യവും കാൽസ്യവുമൊക്കെ അടകിയിട്ടുള്ള ചിയ സീഡ്‌സ് ദഹനപ്രക്രിയ ത്വരിതഗതിയിലാക്കാൻ വളരെ ഉത്തമമാണ്. മാത്രമല്ല ചിയ വിത്തുകൾ കഴിക്കുന്നത് അമിത വിശപ്പ് ഇല്ലാതാക്കാനും സഹായിക്കും. രക്തത്തിലെ പഞ്ചസാരയുടെ അളവ് കുറയ്ക്കാൻ ചിയ വിത്തുകൾ വളരെയേറെ സഹായിക്കും.

മധുരക്കിഴങ്ങ്

കിഴങ്ങ് വർഗ്ഗത്തിൽ പെട്ട ഭക്ഷണങ്ങൾ പ്രമേഹരോഗികൾക്ക് അധികം നിർദ്ദേശിക്കാറില്ലെങ്കിലും മിതമായ രീതിയിൽ ഭക്ഷണത്തിൽ ഉൾപ്പെടുത്തുന്നതിൽ തെറ്റില്ല എന്നാണ് ആരോഗ്യ വിദഗ്ധർ പറയുന്നത്. എന്നാൽ പോഷക സമൃദ്ധമായ മധുരക്കിഴങ്ങ് പ്രമേഹ രോഗികളുടെ ഡയറ്റിൽ ഉൾപ്പെടുത്താം. രക്തത്തിലെ പഞ്ചസാരയുടെ അളവ് നിയന്ത്രിക്കാൻ കഴിയുന്ന ഘടകങ്ങൾ മധുരക്കിഴങ്ങിൽ അടങ്ങിയിട്ടുണ്ട്. കൂടാതെ ഇതിന്റെ ഗ്ലൈസെമിക് ഇൻഡക്സ് വളരെ കുറവാണ്.

ഒരു അഭിപ്രായം പോസ്റ്റ് ചെയ്യൂ

Whatsapp Button works on Mobile Device only